《小傳日記》鮑特會時隔五年再上演！會唔會暗藏啲乜嘢魔鬼契約？

　　侵侵輕鬆過關！民主黨諗著可以出手阻撓到關稅繼續實行，向法庭申請禁制令，結果真係成功，但贏咗唔夠一日，特朗普都未發功，法院一個屈尾十就批准暫緩禁制令，睇嚟民主黨在野都好難打。

　　而對於特朗普嚟講，民主黨喺佢就任頭兩年已經無辦法構成阻力，唔係佢最大敵人，反而美聯儲局入面嘅鮑威爾，先係佢嘅頂心杉！特朗普針對鮑威爾「一男子」嘅發炮次數，唔少得過前總統拜登。當然最可恨就係，對中國對歐盟尚且可以用關稅逼迫，但因為美聯儲局享有獨立決策自由，總統無得干擾美聯儲局利率決策，唯有係咁言論施壓，再唔係破口大罵，但鮑威爾硬淨程度都似乎超出特朗普預期。

　　特朗普一向都係，先嚟「硬攻」，唔得就出「軟攻」，炒又炒唔到，唯有三口六面講清楚。特朗普終於就忍唔住要召見鮑威爾，會面雙方討論咗經濟增長、就業同通脹等多個議題。而會後公布出嚟嘅消息，都似乎係雙方重申返自己嘅立場；鮑威爾方面強調保障經濟穩定，會完全依據最新的經濟數據同前景決定貨幣政策。特朗普方面都當然繼續批評鮑威爾唔減息，白宮發言人就話總統認為唔減息係錯誤，令美國同中國以至其他國家經濟競爭處於劣勢。

　　如果係無改變咁見嚟做乜？特朗普時隔超過五年以來再次同鮑威爾見面，應該唔會只係想當面鬧佢一餐。要親自見鮑威爾一次，好有可能特朗普對於爭取減息已經無乜招數，唯有親自同鮑威爾斟斟，問吓佢究竟想點。其實鮑威爾一直都係鋼鐵意志，減唔減息一定係睇通脹，明明特朗普嘅關稅就係拉高通脹嘅主因，如果要迫到美聯儲局減息，就一定要喺通脹上做到嘢，唔cut關稅就要由其他方面入手。

　　今次會面公布出嚟嘅消息同平時一樣，但可能枱底下鮑威爾已經列明咗一啲可以令官員認為可以開始減息嘅一啲條件，而特朗普都要做得到，咁先可以達成唔cut關稅但減到息嘅願望，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。