《小傳日記》周董轉玩抖音騎劫財經版，巨星傳奇食中新消費淘金熱

　　「你說你有點難追，想讓我知難而退」呢句周杰倫嘅歌詞，可能係唔少股民呢幾個交易日嘅
心聲。話說，巨星傳奇（０６６８３）星期三朝早開市無耐突然爆升，最多升過１﹒９倍。今日
返嚟又再勁升，今朝早曾經升接近四成再破頂。
　
　　咁點解巨星傳奇會突然間「落鑊爆炒」呢？內地網民話係因為周董宣布正式入駐抖音，開咗
一個叫「周同學」嘅帳號，有人更加盛傳抖音用咗九位數去促成周董簽約，令到北水資金琴日瘋
狂湧入同周董有深度關連的巨星傳奇。筆者睇完之後真係不禁「倒抽一口涼氣」，心諗北水真係
藝高人膽大！
　
　　周董喺音樂上雖然已經過咗全盛時期，但仍然係華語音樂頂流中嘅頂流，上年佢喺台灣開演
唱會嗰陣，除咗引發咗幾波「搶飛之亂」，有買唔到飛嘅歌迷甚至揚言要潛入台北大巨蛋附近嘅
下水道偷聽演唱會。今次周董入駐抖音毫無懸念橫掃各大娛樂版，甚至係財經版。
　
　　周董近年雖然轉趨低調，直到２０２０年年中先入駐快手（０１０２４），幾年內發布咗超
過２００個貼文，同進行咗７場直播，而家佢個快手帳號已經有超過４８００萬個粉絲。入駐抖
音之後，咁佢個「周同學」抖音帳號又點算好呢？有報道話周董同快手嘅合作已經到期，舊ａ╱
ｃ可能唔再營運，快手作為內地短片平台二哥，恐怕會流失大量因為周杰倫先註冊嘅用戶。
　
　　講番正題，周董媽媽葉惠美控股巨星傳奇大家都知，不過巨星傳奇業務同周董之間有幾深度
嘅綁定，你又知唔知？巨星傳奇當然就唔係一間經紀公司，唔會幫周董出碟出ｓｈｏｗ，本質上
就係將周董「點石成金」嘅超能力變現。簡單咁講，巨星傳奇透過周董同其他授權明星嘅綜藝節
目、社交媒體去培育ＩＰ。同一時間透過開發新嘅零售產品，借助明星ＩＰ熱度賣嘢，例如「魔
胴咖啡」係巨星傳奇開發嘅其中一款產品，透過周董上節目攞住飲、社交媒體ＫＯＬ等賣廣告，
呢款產品推出第二年銷量就超過３３０萬盒，一年為巨星傳奇貢獻超過３億收入，但如果無周董
加持，魔胴咖啡其實就係一款普通嘅減肥產品；又例如最近穀子經濟大行其道，巨星傳奇打造咗
一款叫「周同學」嘅Ｑ版公仔周邊，最緊要係搞盲盒，逼粉絲買多幾盒博隱藏款，如果一個唔覺
意做咗第二個ＬＡＢＵＢＵ，咁就真係發過豬頭。
　
　　但成也周董敗也周董，翻查返招股書，巨星傳奇２０１９年有接近９０％收入同周杰倫相關
，不過之後幾年相繼攞到其他明星嘅授權，周董對公司嘅收入佔比先降低到６０％左右。巨星傳
奇惟有日日求神拜佛祈求周董生生性性，唔好行差踏錯，如果好似另一個唱作天王咁鬧出醜聞，
咁就咩都賣唔出啦！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。