《魚缸博客》魚缸又開新賭枱，「零日期權」散戶未必玩得掂！

　　今日港交所(00388)話最快出年上半年推出「零日期權」交易(0DTE)，所謂零日期權顧名思義就係呢張option係「交易日」同「到期日」都係同一日發生，即日買賣無得留過夜，一到4:10分收市無論你走唔走都幫你結算。

　　究竟點樣玩法呢？其實佢同一般option無太大分別，但入場價錢更平（美國入場費其實一千幾百美金已經可以），而且價格更敏感。以一隻350美元股價嘅股票為例，每升1蚊個option甚至可以有45%浮動，真係嚇親你。

　　博客早幾年都有睇過海外討論區，甚至有中學生都拎自己零用錢去買呢種0DTE，屬於美國股市入面的流行玩意，呢種OPTION係2022年美國推出，截至2024年第四季度交易量已佔標普500指數期權總交易量的一半以上。

　　但散戶係咪人人都玩得掂？須知道option跌有上限但升無上限，開錯邊已經夠死；其次就係，呢種option必定係由大戶用高頻交易操作，逐蚊逐蚊咁係散戶上面吸血，你手指快唔快得過電腦？一、二、三！你睇住呢三個數字期間，高頻交易已經trade咗幾百單。

　　其實賭場開賭枱，梗係個個開心，但呢隻0DTE本身set到價格敏感度咁高，慢小小都怕你輸突，落到香港係咪跟足美國玩法？不過，如果你話可以一千幾百港紙就可以入場，俾班散戶過下癮，其實都幾唔錯，同賭馬仔一樣啫，不同在於賭馬仔你係靠眼光靠內幕，0DTE就靠你手指夠唔夠快，除非你而家開始學定寫python定下策略啦，否則對抗高頻交易都係輸多贏少。

《編者按》本欄搜羅即市傳聞，惟消息未經證實，《經濟通》亦不保證內容之準確性。