《魚缸博客》HIBOR同美息差拉咁寬，點解無人想做套息？

　　呢一排不論財經台定房屋台，大家都討論緊一個話題：HIBOR跌穿1厘，今日去到0.76厘，真係低處未算低；港匯差不多去到7.83，金管局又要睇實預備入市干預。

　　呢一次余偉文就話啦：低利率環境未必持續，置業及投資要管理好風險。的確，低利率是否持續，還要看美國6月國債。等博客同大家剖析下呢一輪「資金逃難潮」嘅前世今生。

　　其實早喺4月尾至5月頭，一堆熱錢流入亞洲市場，分別睇得出港匯、新台幣升幅最大，甚至連韓元都有少少作動；歸咎原因，就係大家意識到美國6月有6.5萬億元美債到期，同時大家質疑美國一路玩開嘅「新債蓋舊債」已經唔work，所以資金逃離美國去左亞洲區。
　　
　　而香港因為「逃難潮」下，搶貴晒港紙，令金管局入市注資穩定聯繫匯率，而家港紙水浸下，令港匯走弱、同一時間銀行同業拆息（HIBOR）由高位回落，而家港美息差去睇都成有三厘幾，走去做套息咪好和味？

　　呢個你要思考返個因果關係，個因係資金要去亞洲避險，令港匯、拆息下跌，如果呢個時候拎香港舊錢去美國做套息，某程度係賭緊美國6月搞唔搞得惦，如果搞唔惦的話，美元美債就會出現危機，大家繼續拋；但係如無意外順利度過，錢就自然會流返出去美國，香港拆息回落，而你就食到三厘幾息差。

　　所以而家套息並唔係套息咁簡單，而係一次豪賭嘅旅程，你有幾十、甚至幾百萬，都可能賭一次，但如果你係千萬、億計資產，會唔會咁樣賭法？我睇就未必啦。

《編者按》本欄搜羅即市傳聞，惟消息未經證實，《經濟通》亦不保證內容之準確性。