《魚缸博客》內地熱炒「谷子經濟」概念，係咪真係咁好景？

　　《魚缸博客》博客真係日日都長知識，同班後生仔傾下計，最近又學識一個新單詞－谷子經
濟，唔好以為同種大豆谷物有關嘅經濟，其實佢只係食個音「Ｇｏｏｄｓ」，所以英文叫「
Ｇｏｏｄｓ　Ｅｃｏｎｏｍｙ」：谷子來自二次元文化，泛指的漫畫、　動畫、　遊戲等ＩＰ周
邊商品，如徽章、卡片、　掛件等。
　
　　近期不論係ＬＡＢＵＢＵ定係ＣＨＩＩＫＡＷＡ大家都瘋搶，係博客眼中係兩個世代嘅「谷
子」喺度打對台，前者係單靠網絡＋名人宣傳崛起，後者係由動畫興起嘅周邊。其實兩者本身無
咩衝突，係兩班客人，但可以睇到前者風頭好似更大、盈利更高。
　
　　而中國ＩＰ出海，某程度可以體驗到文化輸出嘅威力，唔好講ＬＡＢＵＢＵ，之前《原神》
、《黑神話：悟空》都已經殺出海外，可以同「日谷」（日本谷子）爭一日之長短，你會發現中
國谷子個市場真係大到無朋友。
　
　　歸咎原因，係中國人有錢咗，願意花錢係自己喜歡嘅喜好之上；其次就係不婚不孕嘅人多咗
，多咗錢用，就自自然然流向呢種市場；再者「谷子」係一個好好嘅社交途徑，入場成本好低，
低則幾十蚊買一個公仔就可以交到朋友，再建立共同話題。
　
　　其實內地谷子經濟只係剛剛起步，就算ＬＡＢＵＢＵ完左，可以有ＡＢＣＤＥＦＧ去代替，
關鍵係個消費人口仲喺度，而且龐大，你有創意就自然可以發圍，前景係點？你睇泡泡碼特
（０９９９２）個股價係點就知。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。