《魚缸博客》快手未來要靠AI食胡？真假資訊難分別仲信唔信好？

　　快手(01024)終於公布業績，其中線上營銷服務收入按年增加8%至180億元；直播業務收入按年增加14.4%至98億元。不過業績有部分亮點，就係首季度可靈AI收入超過1.5億元。

　　關於可靈AI，博客都上網睇過下片，結論得出四個字：十分強大。基本上係俾Content Creator用，特別係一啲資訊類短片，以後唔使用罐頭片做過渡，只要你輸入你想要嘅內容，用「文字」去生成「影片」，入面仲可以調教鏡頭、入面嘅物件點移動，基本上用起上來十分User Friendly。

　　所以1.5億收入來講，博客覺得只係起步，如果呢個AI可以出到海，前途無可限量，皆因博客都用過部份外國影片AI工具，依然睇到有唔少穿崩位、BUG位，可以用但你應用到商業就有難度，而呢方面可靈AI做得比較出色。

　　至於大行點講呢？大和研究報告指出，快手第一季業績大致符合市場預期，該行認為可靈AI變現能力與電商GMV增長將成為2025年快手股價的主要催化劑。該行維持快手「買入」評級，目標價70港元。

　　而家AI只會越來越強大，所謂「後真相時代」，「真相」經過AI加持下，只會越來越模糊，眼見都未必為實。所以可以估計到，未來真假資訊只會越來越難分辨，信唔信好？要經過腦袋思考下啦。　　

《編者按》本欄搜羅即市傳聞，惟消息未經證實，《經濟通》亦不保證內容之準確性。