《魚缸博客》「黃金界Hermes」老舖黃金市值超越周大福？

　　近期大家都係炒金賣金多，但見到有隻「神話」股份升得何其癲，講緊就係隻老舖黃金(06181)，今日市值已經去到1345億，超越周大福(01929)嘅1176億，究竟呢隻堪稱「黃金界Hermes」，點解僅僅得幾十間門店，可以撐起千億市值呢？

　　要解剖呢間「老舖」，首先你唔可以當佢係一間普通金飾舖去睇，嚴格定義上，佢屬於「奢侈品店」，人地金舖賣800蚊一克黃金，飾金最多咪俾多幾十蚊你做工錢，但老舖黃金賣個價錢可以去到1500蚊一克，硬生生咁將黃金賣貴一倍。

　　點解可以賣到咁貴？老舖黃金聲稱佢啲金飾全部係由手工製造，同奢侈品手袋市場同一個道理，跟住就掟出好多古法製金術語，例如「點翠」、「燒藍」、「金銀蠟」，拋書包拋到你肯畀錢為止。聽聞佢有個款式係一個人手打造嘅「項鍊囊包」，一個黃金金飾入面可以打開放香囊，好多女性顧客都喜歡呢隻款！

　　基本上，佢係賣手工、賣服務、賣售後，所以點解可以賣到咁貴係有原因，而重點係，喺呢條賽道上，佢幾乎無對手。其實其他金行都嘗試過學老舖黃金咁，包括本港金舖，又係整一堆古法手工金飾去賣，但就係賣唔過人地，最後要放棄。

　　點解LV、DIOR、CHANEL、勞力士點解做到名牌，賣到個溢價咁高，係因為人地除咗手工製造之外，本身喺配貨上係做過功夫。你行入去呢種名牌店，唔係話你有錢就賣俾你，你幾有錢都好，都要先買入門款，消費到一定金額做VIP，先可以俾你買到新款；除非你唔介意用二手款，不過有錢有時間，就會有人去排隊。

　　呢種「稀少性」玩法，老舖黃金將自己產品由「金飾」變成「奢侈品」，行唔一樣嘅路。會唔會無對手？而家無，但將來一定有，搵到錢嘅嘢，點會得一家獨大？

《編者按》本欄搜羅即市傳聞，惟消息未經證實，《經濟通》亦不保證內容之準確性。