《小傳日記》車圈恒大論觸口水戰，電進油退車企埋身肉搏？

　　《小傳日記》內地汽車業界最近鬧得沸沸揚揚，神州工信部出來維穩，將加大力度整治汽車
行業「內捲式」競爭，強調「價格戰」沒有贏家、更沒有未來。而《人民日報》發文警告，指價
格戰將導致產品力下滑，並令「中國製造」口碑大跌。官方有官方維穩，但車企則有車企繼續唇
槍舌劍。
　
　　長城汽車（０２３３３）董事長魏建軍早前接受訪問時表示，已有車企淪為「車圈恒大」，
只係暫時仲未爆破。他同時批評有啲車廠為咗追求市值、抬高股價，不惜打價格戰甚至偷工減料
，將滯銷車當「０公里二手車」去賣，呢種行為嚴重威脅產業安全。而咁啱得咁翹，魏建軍受訪
當日，比亞迪（０１２１１）股價創新高，跟住又宣布２２款電動車減價促銷。
　
　　上個禮拜五（３０日），比亞迪品牌及公關處總經理李雲飛發文指，中國主流車企根本唔存
在所謂嘅「車圈恒大」，佢更加點名魏建軍，話對方不時有驚人言論，例如２０２１年誇下海口
，要喺２０２５年完成年銷量４００萬輛、營收超過六千億人仔目標。又嘲諷魏建軍距離呢個目
標嘅時間無多。
　
　　打嘴炮呢家嘢又點少得華為常務董事余承東呢，佢日前出席公眾場合嘅時候表示，有企業憑
藉強大品牌能力，就算質量做得唔係咁好，一樣可以大賣特賣。反觀華為嘅產品，就算質量好、
體驗好、性能好，樣樣都好過佢，但都唔夠佢賣得咁好。佢仲話，如果按照華為嘅質量標準，有
啲車廠一架車都唔應該賣。余承東呢番言論被認為係影射小米（０１８１０）。
　
　　而小米創辦人兼董事長雷軍就喺微博發文，除咗公布小米汽車新舊兩款車最新動態之外，發
文結尾引述２０１２年諾貝爾文學獎中國作家莫言名句：「詆毀，本身就係一種仰望」，呢句話
被指係對余承東嘅回應。雖然雷軍無幾耐就刪咗莫言名句，但就保留含有嗰句話嘅圖片。
　
　　神州汽車市場無論係產量定係銷量，呢幾年都錄得可觀增長。但車市一片欣欣向榮嘅同時，
汽車減價仍然不絕於耳，顯示車企之間嘅競爭早已白熱化。睇番數據，今年頭４個月內地汽車產
銷量分別完成１０１７萬輛和１００６萬輛，同比分別增長１２﹒９％和１０﹒８％。其中，新
能源汽車產銷量分別完成４４３萬輛和４３０萬輛，同比分別增長４８﹒３％和４６﹒２％。數
據整體向好，但可惜報喜不報憂。新能源車（主要電動車）產銷大增同時，意味住傳統能源車（
油車）空間進一步被擠壓。按照上述數據，意味住傳統能源車頭４個月的產、銷按年分別下跌
４﹒６％同６﹒２％。
　
　　既然新能源車咁好賣，點解華為同小米又會出現疑似明嘲暗諷？其實新能源車之間嘅競爭同
樣激烈，而且創業初期，車企大量資金投入，至今仍未唔少企業未有錢賺，繼續燒錢。其實新能
源車呢塊餅可以再做大嘅空間已經唔多，咁就唯有將其他參賽者踢出局部份車企固然靠真材實料
，亦難免有啲摻雜吹水成份，靠行銷手法，所以引來同行熱議。
　
　　恒大爆煲前係內房巨無霸，至於車企嘅巨無霸暫時從財報上睇尚算可以。但相對較細車企情
況仲未樂觀，其他唔講，就以電動車新勢力為例，蔚來（０９８６６）同小鵬（０９８６８）暫
時都仲要蝕錢，舊年分別蝕２２６億同５７億人仔，幾時止血暫時仲係未知之數。如果今年未能
止蝕，咁幾時先可以呢？剩返嘅現金夠燒幾耐？呢個問題遲早要面對。
　
　　車企嘅減價戰或暫時平息，但唔表示內捲情況會停止，假如日後有車企提供買車送電視機，
甚至搞大抽獎買一送一又得唔得？所以，為咗生存，未來車企銷售招數或更層出不窮。莫講話口
水戰，埋身肉搏戰似乎都無可避免。請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。