《魚缸博客》泡泡瑪特聯乘作又爆紅，順風順水ｓｕｒｅ　ｗｉｎ？

　　《魚缸博客》呢期師奶阿叔就算唔識ＰＯＰ　ＭＡＲＴ，都會聽過佢間上市公司泡泡瑪特
（０９９９２），除左股價飛上天未打算落地之外，近期都幾多新聞。
　
　　第一單，就係ＰＯＰ　ＭＡＲＴ已經進軍歐洲，係歐美韓歌手一齊加持之下，唔少歐洲人已
經開始搶ＬＡＢＵＢＵ，早個禮拜已經有英國人因為搶唔到心頭好而大打出手。搶唔到公仔就要
出手？以英國人性格，真係唔意外，但係真係「出手」定係「演技格鬥」，博客就有保留，畢竟
有時候想要上新聞，係需要小小「情緒」＋「動作」。
　
　　第二單，就係近期史迪仔電影上畫，簡直就係全球大賣，所以ＰＯＰ　ＭＡＲＴ都立即聯乘
史迪仔，係上個月尾一推出，就被人搶購一空，同香港人搶演唱會飛一樣。３００幾蚊隻公仔，
轉手擺上網可以翻倍賣出，甚至三倍都見過。
　
　　無可否認，泡泡瑪特呢種行銷手法確實犀利，搞到個個瘋搶，人手一人一隻咁；不過博客不
禁要問：呢種行銷可以行到幾耐？可以睇下一個例子。
　
　　博客仲讀緊書個陣，「ＳＵＰＲＥＭＥ」呢個牌子真係好流行，而佢同泡泡瑪特都有個共通
點－聯乘，ＭＯＮＥＹ　ＧＵＮ可以印個ＬＯＧＯ，波鞋、衫、皮帶又可以印，連一舊「紅磚」
都可以印個ＬＯＧＯ賣幾千蚊，個風頭同今日ＰＯＰ　ＭＡＲＴ一模一樣。不過好似流行左三幾
年之後，大家都開始有「審美疲勞」，覺得佢厭倦，而家已經出街都唔見有人著佢件Ｔ－
ＳＨＩＲＴ。
　
　　可以話，「審美疲勞」可能係泡泡瑪特最大嘅敵人，而潮流呢家嘢係可以話突然唔中意就唔
中意，無數據、無跡象、無預測。以前都一人一隻史路比，食Ｍ記包食到嘔，而家係咪仲有人玩
緊？你話啦。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。