《小傳日記》解禁前放風炒高近四成！龍頭股爭住幫襯黑芝麻晶片？

　　「天神之眼」威力強勁，炒到今日一眾智能駕駛概念繼續放量齊升，BYD(01211)今日進一步強勢破頂，令人更加期待呢間電動車龍頭究竟會有咩驚天地泣鬼神嘅消息會公布。

　　炒到第二日，都開始有「天神之眼」供應鏈系浮面。今日有「市場消息」提到，黑芝麻智能(02533)嘅自動駕駛計算晶片已獲BYD旗下騰勢採用，隨後內媒向黑芝麻查詢，公司直認晶片的確係獲BYD採用，仲已經量產出貨，但具體細節就不便透露。

　　智慧駕駛作為車企兵家必爭之地，作為供應商黑芝麻封口的確在所難免，不過全日夾埋黑芝麻最多曾暴升五成，證明跟炒概念同名正言順嘅供應商真係有唔同。

　　黑芝麻作為18C第二股，上市無耐就畀BYD吼到，一定有返咁上下斤兩。但正正係上市剛滿半年，新股必經嘅大劫「基石投資者解禁」下星期一（10日）就登場，正好又係BYD「天神之眼」發布會舉行嘅日子，以BYD咁大間公司嚟講，當然唔會為咗供應商黑芝麻而作出特別安排啦，所以黑芝麻可謂相當好彩，可以試下去買六合彩。

　　翻查返黑芝麻上年上市份招股書，截至上年3月底，有關客戶披露入面無直接提及BYD貢獻公司嘅銷售額，唔可以肯定咁講實BYD向黑芝麻落咗幾多單，可能上年3月之後BYD先向黑芝麻落單。不過除此之外，比較肯定係聯想(00992)都有向黑芝麻買晶片，上年頭三個月就貢獻大約332萬人仔，佔期內公司收入約12%。

　　Lenovo都有幫襯，可能黑芝麻晶片真係有過人之處。但放風大棍炒高股價，坐等下星期一返嚟解禁出貨，做法上就難免面斥不雅。但單睇收入黑芝麻的確每年都有得升，過埋解禁呢劫，咪睇吓有幾多人繼續接貨囉，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。