《小傳日記》不認不認還須認，ＳＨＥＩＮ三遷赴港上市認祖歸宗！

　　《小傳日記》小傳細個嗰陣成日都聽孟母三遷嘅故事，估唔到現代居然有ＳＨＥＩＮ為上市
而「三遷」嘅大粒花生可以食。話說，港交所（００３８８）行政總裁陳翊庭前幾日公開講，而
家有超過１５０間公司排緊隊嚟香港上市，形容香港新股市場會繼續受惠Ａ＋Ｈ股上市，同埋
ＡＤＲ回流喎。咁小傳梗係即刻幻想下仲有咩巨無霸未上車啦，點知過咗一陣就傳ＳＨＥＩＮ準
備嚟香港上市。
　
　　為免有粉絲唔知ＳＨＥＩＮ嘅傳奇故事，呢度就簡單介紹吓。ＳＨＥＩＮ其實係一間嚟自內
地南京嘅快時尚品牌，雖然公司總部已經搬咗去新加坡，不過佢嘅核心業務仍然同中國有密切關
係，包括生產、設計、採購一籃子嘅業務都喺內地進行，甚至喺廣州番禺有條村就係靠做
ＳＨＥＩＮ供應鏈發家嘅，人稱「ＳＨＥＩＮ村」！早前有諮詢機構講過，ＳＨＥＩＮ借住佢嘅
數字化按需柔性供應鏈優勢，成為而家增長最快嘅時尚零售商，超越國際大牌子Ｚａｒａ、Ｈ＆
Ｍ等等。
　
　　不過！小傳咁樣寫梗係唔慌有好嘢發生，ＳＨＥＩＮ上市嘅旅程可以形容為「一波三折」。
ＳＨＥＩＮ最開始其實想喺紐約上市，後尾因為美國監管機構同埋當地議員阻攔，加上阿爺又唔
建議佢美國上市，所以就臨時轉陣想去英國掛牌。但係！ＳＨＥＩＮ去到英國又係奶晒嘢，所謂
人紅是多，除咗政治壓力之外，又畀歐盟指控佢打虛假折扣、壓力行銷，又咁啱遇上美國關稅重
擊，不過最重要嘅係，ＳＨＥＩＮ嘅境外上市申請始終未能得到阿爺批准，可能係驚到英國上市
之後被狙擊，影響面子掛。
　
　　《路透》噚日引述消息人士話，ＳＨＥＩＮ嘅英國ＩＰＯ上市計劃幾乎停滯，最終都係要認
命，轉跑道嚟香港ＩＰＯ掛牌，並計劃未來幾星期向港交所交招股書。不過聽聞，由於美國取消
價值８００美元以下包裹免稅，導致ＳＨＥＩＮ大受打擊。所以無論ＳＨＥＩＮ喺邊度上市都好
，佢最終ＩＰＯ估值都會取決於取消免稅所帶來嘅影響，之前有傳聞話ＳＨＥＩＮ市值喺５００
億美元左右，就已經比尋求美國上市嗰陣嘅估值低咗近四分之一，而且仲未計關稅戰同港股流通
性影響，市值可能要再低一截。
　
　　近排寧王（０３７５０）、恒瑞（０１２７６）等等嘅新股首日掛牌嘅表現都非常唔錯，若
果ＳＨＥＩＮ今年內真係有機會喺香港上市，唔知佢有冇機會成為今年下半年嘅新股首掛王呢？
急住變現嘅幕後玩家當然最關心股價走勢，只不過ＳＨＥＩＮ就有苦自己知。ＳＨＥＩＮ呢幾年
都一直想同神州保持一段「社交距離」，以免影響佢嘅全球化形象，但如果美國上唔到市、英國
上唔到市，偏偏到香港就成功登陸，咁就真係海外游子落葉歸根啦，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。