《小傳日記》人工智能初創有人工冇智能，微軟軟銀都被呃！

　　話說喺呢個AI點石成金嘅年代，無論係寫文章、畫畫，定係寫程式，ChatGPT、DeepSeek都可以輕鬆搞掂，用家只需要寫好個提示詞，就可以不斷「抽卡」等結果生成。其實人類對AI嘅不下30年，喺上述生成式AI產品橫空出世之前，原來有一家名為Builder.ai嘅英國初創公司，其實早就實現咗用AI幫手寫code！

　　大家都知寫code係一份勞心勞力嘅工作，唔單止學習門檻高，而且工序繁瑣沉悶，有時為咗一項需求要寫幾百行代碼，所以神州程序員都會叫自己碼農！如果有AI寫手幫寫code，唔單止可以解放程序員嘅勞動力，而且可以為科技公司慳番唔少，可想而知Builder.ai當時有幾咁意氣風發！Builder.ai手握微軟、軟銀同卡塔爾投資局等重磅資本嘅投資，將公司估值推到15億美金，但讀者應該估到後續啦，隨著各大科技公司都推出自家生成式AI模型，AI寫code「頂流」Cursor大行其道，Builder.ai好自然被時代淘汰，如今仲宣布破產添。

　　如果係好單純係技不如人被時代淘汰，咁就不值一提啦，但原來呢家AI公司，係只有人工沒有智能！你以為佢用AI幫你寫code，事實上背後係一班印度程序員幫你代筆咋，如果用家忽發奇想同AI傾心事，咁咪好尷尬？

　　Builder.ai創始人Sachin Dev Duggal喺2016年拋出一個超吸引嘅願景，話要任何一個唔識寫程式嘅人，都可以好似點pizza咁整出一個自己嘅App！Duggal團隊仲「開發」咗一個AI助手叫Natasha，話可以通過對話理解你嘅需求，然後自動幫你整合代碼模塊，將你嘅想法變成一個真正嘅App，呢個idea同而家嘅問答型大模型差唔多，連使用界面都係差唔多。

　　打開佢哋網站，用戶只要同Natasha傾偈，話想整一個類似Uber嘅App，或者一個網店平台，佢就會同你互動，問你一啲問題，然後幫你生成程式碼。Natasha寫code係慢咗啲，但嗰陣時大家都覺得，AI嘛，新嘢，慢啲都正常啦，總之整到嘢出嚟就得。

　　但後來媒體踢爆話，Natasha其實真有其人，而且唔係得一個人，而係一班遠喺印度嘅程序員用WhatsApp答你問題，聽落好荒謬其實又好合理，唔少科技公司都會搵印度公司外包寫code，貪佢夠平，只不過今次係用AI做包裝啫，但問題就出喺呢度，外包公司有放工時間，但係AI冇，要做到24小時服務客戶，公司就要請大量員工充撐，人工成本自然就爆升，盈利模式完全唔可持續，最後就只可以「做數」瞞天過海。

　　據報導，Builder.ai向投資者同貸款方提供咗嚴重誇大嘅財務數據。2024年，佢哋話預計收入有2.2億美金，但實際收入得5500萬美金，誇大咗足足三倍。呢啲假數據幫公司勉強撐住融資同運作，但好景唔長。今年5月，高級貸款方Viola Credit發現Builder.ai違反貸款協議，果斷凍結同扣押咗公司戶口入面嘅3700萬美金現金，令公司只剩500萬美金，公司無奈要裁咗大部分員工，正式申請破產。呢場由「人工」撐起嘅「智能」泡沫，終於爆破。

　　講真，點解連微軟同卡塔爾投資局呢啲精明嘅投資者都會俾Builder.ai呃？答案離唔開Sachin Dev Duggal嘅「光環」。呢位創始人14歲開始創業幫人裝機，17歲為德意志銀行開發貨幣套利系統，21歲創辦Nivio公司，估值達1億美金，仲賣咗出去搵到第一桶金，極似蓋茨或扎克伯格嘅人生履歷。佢熟悉硅谷文化，口才一流，再迎合AI時勢，講靚個項目故事，融資幾乎就水到渠成。

　　話說回來，如今AI創業大行其道，今日有人開發App揀午餐食乜好，聽日有人用AI幫你睇風水，但筆者奉勸創業家們要三思，而家寫code技術門檻太低，一個App紅咗就會有成千上萬個山寨版，如果唔係咩驚世發明，都係唔好貿然推出跟住收用家訂閱費啦，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。