《小傳日記》電視盒子市場凍過水，小米時隔7年再推新款為咗乜？

　　今個周末，小米(01810)竟然靜靜雞推出咗兩款新嘅電視盒子產品，小米盒子5同埋小米盒子5 Max。講真，電視盒子呢樣嘢，聽起嚟都有啲陌生，神州好多人已經慣咗用手機、pad煲劇，就算要揀電視，都會買一部內置串流媒體平台同語音控制功能嘅智能電視！言歸正傳，小米上一次出電視盒子已經係七年前，當大家都以為呢條產品線已經被放棄嘅時候，小米盒子突然回歸。

　　講起電視盒子，可能大家第一時間會諗起Apple TV，可以支援4K HDR同杜比音效，可以冇廣告睇Netflix、迪士尼動畫，仲可以搭配Xbox或者PS手掣嚟打機。講返小米盒子，其實功能都差唔多，好似畫質增強技術，可以將720P或者更低分辨率嘅畫面，搞到更清晰；支援4K解碼同杜比視界(Dolby Vision)。

　　雖然功能睇落都幾有用，但喺電視嘅使用率本身已經下降嘅情況下，電視盒子市場早以萎靡。根據神州新媒體調研報告，2024年中國智能盒子嘅全年銷量得249萬台，同比下降咗20.4%，相當慘淡，而相比十年前，市場規模已經縮水到不足當時嘅五分之一。

　　喺咁萎靡嘅市場環境之下，小米竟然仲要堅持推出新嘅電視盒子，究竟佢哋諗緊啲咩呢？小米嘅目的應該唔係單純想靠賣電視盒賺錢，而係喺生態同內容服務上有更長遠嘅布局。首先係小米引以為傲嘅人車家全生態，小米盒子運行嘅係小米澎湃OS，可以同米家設備聯動，例如你喺睇電視嘅時候，如果有人按門鈴，畫面可以即時喺電視上顯示出嚟；你仲可以用電視控制掃地機、空調或者燈光，打造一個全屋智能場景。小米盒子就相當於係一個家庭智能控制中樞。另外，小米盒子入面仲內置咗小愛同學嘅新版本，可以幫用戶搵片、查天氣，甚至幫你安排家庭活動計劃，進一步完善咗小米嘅智能家居生態。

　　其次，小米電視盒子仲可以作為推廣小米音樂同小米影視嘅一個重要媒介。小米今次推出買小米盒子5 Max會送一年小米影視會員，好明顯係一種引流策略。並且，你買咗小米盒子，好大機會都會訂閱小米嘅影視同音樂會員，賣電視盒子可以吸引更多人進入佢哋嘅生態閉環。

　　自從小米汽車爆大鑊之後，雷軍大佬都忍唔住喺社交平台度呻，「呢個月係人生最難捱嘅日子」。接下嚟睇下哩部​​細細粒​​嘅電視盒子，可以喺小米嘅人車家生態中發揮幾大嘅作用呢？我哋拭目以待，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。