《魚缸博客》契媽撐Tesla上二千六係愛定責任？係貪平咋！

　　熱捧中概股aka「中粉」嘅契媽Cathie Wood，今年以來因為美股回調同老撐Tesla嘅關係，呢一季都輸咗止些少。不過識得契媽耐都知佢份人打不死，睇錯市都可以靠坐艇捱到翻生，係真正「贏就陪你君臨天下，輸就陪你東山再起」，就好似最新吹奏Tesla豪言一樣。

　　契媽最新吹奏Tesla五年內可以挑戰2600美金，當中最主要嘅推動部分係Robotaxi，會佔=當時價值嘅九成。契媽話，目前Tesla以續航里程同功率計仍然相當有競爭力，但係咪最具競爭力就要睇車型。而且2600美金入面，仲未包括目前Tesla對人形機器人嘅研發，換言之仲有大把空間。

　　雖然契媽講到好有理有據，但背後都係基於老股民都識嘅技巧，就係撈底。Tesla由上年12月中高位488美金跌到落早幾日低見217美金，跌幅已經超過去一半，返到落去上年底炒Trump trade嘅差唔多水平，而目前馬斯克仲係特朗普嘅東廠大總管，理應未至於差過Trump trade之前，而家撈底的確係合情合理。

　　另外，契媽對熱愛嘅中概股都一樣愛撈底，最新公布旗下兩隻ETF就一齊入手百度ADR，合共加倉接近13萬股。契媽之前又話係因為阿爺發展新質生產力初見成效，實質咪又係吼中隻百度行返個回升浪，博佢繼續上咁啫，講到尾都係撈底最實際！

《編者按》本欄搜羅即市傳聞，惟消息未經證實，《經濟通》亦不保證內容之準確性。