《魚缸博客》來都來了，早排走咗轉１１　ＳＫＩＥＳ……

　　《魚缸博客》早幾排博客去旅行，渣住架車去機場，屋企班化骨龍早到又無咩好做，
Ｃｈｅｃｋ完ｉｎ之後，反正「來都來了」，咪渣車走轉Ｋ１１Ｓｋｉｅｓ，睇下呢個新世界
（０００１７）投資咗２００億嘅新場，有幾咁精彩。
　
　　哇，真係好精彩，博客以為做緊「神功戲」，個場一個人都無，連冷氣都唔見有點開，博客
去個陣係今年４月幾，未算太熱，都係嗱嗱聲走返上車算。
　
　　據《彭博》引述消息指，新世界計劃蝕讓機場航天城１１　ＳＫＩＥＳ，市場估計大約都係
值１５０－１７０億左右，意味就算賣走都最少唔見３０億，邊個接手？據聞同機管局傾緊，又
搵阿公出數啊？
　
　　其實１１　Ｓｋｉｅｓ個定位幾尷尬，佢係想做「機場城市」入面一個大商場，遊客反正「
來都來了」，走一轉消費下買下手信都好正常；但個問題在於，而家個商場出租率得四成，更關
鍵係冇遊客。
　
　　要機管局用１７０億接手一個無乜人嘅商場，呢單「刁」都唔係價錢咁簡單，而係「智慧的
考驗」。單靠機場遊客撐起一個商場人流，博客認為相當之難，因為遊客係有周期性，冇人嗰陣
鋪頭點圍皮？開喺咁偏僻嘅地方冇本地客撐起又點玩？你睇九展都要拆卸重建就知道，起呢種地
標有三個重要因素：Ｌｏｃａｔｉｏｎ，Ｌｏｃａｔｉｏｎ，同埋Ｌｏｃａｔｉｏｎ。
　
　　就算新世界今日無事無幹去經營呢間商場，２００億成本開喺呢個位，要出租幾耐先回到本
？呢件事真係好老夫子－耐人尋味。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。