《小傳日記》寧王股權集中開心大發現！殊不知雪王都係咁……

　　《小傳日記》近排魚缸新股市場真係旺咗好多，雖然大部分都係Ａ股回Ｈ，但有集資就有錢
入市，對於提升返港股國際ＩＰＯ都地位都係有所得益。
　
　　比起早一兩年嘅新股寒冬，上埋啲都係三四線奀股，真係敲完鑼都無人聽到。而近期又「雪
王」又「寧王」，連波叔同陳翊庭都成日出場站台，就知魚缸ＩＰＯ真係全面活化，而寧德時代
（０３７５０）更加成為年初至今全球最大集資額公司，有價有份量，當然睇到人牙癢癢。
　
　　人紅多是非，除咗美國有議員唔老黎摩通唔聽話硬係要幫寧王搞ＩＰＯ，仲有連休養嘅
Ｄａｖｉｄ　Ｗｅｂｂ都忍唔住要關注一下。阿Ｗｅｂｂ就話，計埋超額配股之後，Ｈ股數量只
有大約１﹒５６億股，佔公司總股本３﹒４２％；而呢１﹒５６億股入面，有大約７７４５萬股
喺１１月１９前都係禁售，變相未來半年都係炒剩低７８４６萬股，前２５名Ｈ股股東亦已經持
有Ｈ股股份近七成，變相散戶炒緊嘅股數就更加少。
　
　　「捉妖」係Ｄａｖｉｄ　Ｗｅｂｂ畢生志願，股權集中嘅妖股就係阿Ｗｅｂｂ嘅打擊對象，
而寧王嘅火爆當然都吸引咗佢去留意。需求上升刺激價格上漲，係經濟學最基本嘅供求定律。而
呢一個定律，近年都被活用於新股市場之中，尤其神州就熱愛呢種炒法。
　
　　其實除咗「寧王」之外，活用供應量少要炒高股價嘅，連前面提到嘅「雪王」都一樣。蜜雪
（０２０９７）上市當日高收４３％報２９０銀，截至今日更加高見５６３銀，以招股價計至今
每手已經暴賺３６０５０銀，抽到到而家都未放可算係大富大貴。不過雪王情況其實同寧王差唔
多，以雪王發行約１﹒５１億股Ｈ股計，創辦人張紅超同張紅甫各自持有約５４５４﹒７萬股Ｈ
股，已經係Ｈ股發行總股數嘅７３﹒５６％，再計埋５名基石投資者合共持有７６９﹒２６萬股
（佔Ｈ股發行總數５﹒１％），即係１﹒５１億股Ｈ股面入面，有近１﹒１７億股都係非流通，
雪王呢１﹒７８倍升幅，全部都係靠剩低嘅約２１％流通Ｈ股炒上嚟，比起寧王同樣係流通股量
極低。
　
　　股權集中唔好呀，不過股權集中可以令到股價飛天，蜜雪升緊就快兩倍，至今個個有錢賺，
又有邊個理集唔集中？係估唔到大如寧王都要用呢套方法啫，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。