《Online有話兒》蓋茨離婚分身家惹關注，中外名人離婚財產又點分？

　　微軟創辦人比爾．蓋茨與結婚27年嘅太太梅琳達共同宣布離婚，呢個震撼彈公布之後微軟股價未有太大反應，不過大家比較有興趣就係蓋茨點樣分身家，同埋基金會後續點處理，今日就同大家細數中外名人離婚之後，佢哋財產又會點進行分配。

蓋茨身家達1300億美元，會同前妻繼續基金會工作

 （AFP圖片）

　　蓋茨同梅琳達係呢次離婚聲明中表示，兩人不再相信係人生下一篇章裡，仲可以作為夫妻一齊成長，離婚係深思熟慮之後嘅決定，期望係結束婚姻展開新生活，並希望外界可以給予空間同私隱。文中並沒有提及兩人點解離婚，唔通真係好老土嘅「因了解而分開」？不過蓋茨都話，兩人仍然會繼續係共同建立嘅「蓋茨基金會」工作。離婚又唔代表真正割離，都可以係好朋友、好同事嘅。

　　不過，根據兩人向西雅圖金縣高等法院所呈交嘅《簡易離婚聯合申請書》提到，兩人列明「婚姻破裂得無可挽救」 ，並已經就點樣分配資產達成協議。由於佢哋三個人嘅仔女都已經大個，外界估計最大機會係兩者平分資產，目前蓋茨身家估值達1300億美元，如果平分的話，梅琳達可能係世界上最有錢嘅女人。

　　不過據指呢次「分身家」都相當困難，皆因蓋茨旗下資產複雜，目前僅持有微軟2%股權，其餘原本持有嘅微軟股權一早轉入慈善基金會；而蓋茨持有嘅最大資產係控股公司Cascade Invsetment，呢間公司名下有不同嘅房地產、能源、酒店公司股權，仲有十幾間上市公司持股，係咪就咁一開二平分呢間公司都相當考功夫。

亞馬遜創辦人貝索斯離婚，前妻麥肯齊分4%亞馬遜股權

（Shutterstock圖片) 

　　亞瑪遜創辦人貝索斯同前妻麥肯齊係2019年1月宣布離婚，當時佢哋共同持有亞馬遜16.3%股權，經過兩人協商之後，麥肯齊分得公司4%股權，當時市值約356億美金，亦令佢成為當時世界上第三富有嘅女性。不過，當時媒體都知道，呢300幾億都只係麥肯齊嘅帳面身家，而實際身家肯定高過呢個數字；根據2021年嘅《福布斯》富豪榜，麥肯齊身家已經達530億美元，位列全球富豪榜第22名。

日本巨星北野武離婚，200億日圓全數分給前妻

 （Shutterstock圖片) 

　　睇完有錢人，又睇下明星點分身家啦！好似日本明星北野武咁，係2019年宣布同結婚40幾年嘅妻子北野幹子離婚，據指離婚係因為北野武想同一個細佢18年嘅女人一齊，甚至已經有私生子，而本身兩公婆已經分居7年，所以佢將超過200億日圓嘅財產留畀前妻，自己只係留返一套東京高級住宅自住。

　　雖然北野武本身仍有好高嘅搵錢能力，高峰時期係日本仲有6個電視節目，不過佢自己都承認無錢之後朋友都慢慢同佢疏離，並且承認後悔同前妻離婚。

大劉同呂麗君分手，後者合共得20億港元資產

　　綽號「大劉」嘅富豪劉鑾雄，曾經同呂麗君有一段12年嘅感情，並育有一子一女劉秀盈及劉子鋒。出名大方闊綽嘅劉鑾雄，據指當年對呂麗君照顧其起居飲食，更給予大量現金及禮物，隨後大劉公開指二人已於2014年分手，並聲稱多年來已經送贈20億港元資產畀呂麗君，包括山頂白加道獨立屋、中半山雅賓利大廈單位連車位等多個物業。

　　據悉當年兩人分手時曾簽下協議，以防日後發生「溏心風暴」事件，不過有指呂麗君對大劉移情別戀心感不甘，大劉曾聲稱呂麗君要一對仔女都要恨自己；不過，仔女二人日漸長大，長女劉秀盈曾係社交網站分享與父親溫馨合照，可見父女情依舊不變。

撰文：李皆穎

【香港好去處】2025去邊最好玩？etnet為你提供全港最齊盛事活動，所有資訊盡在掌握！► 即睇