《魚缸博客》《燕雲十六聲》會係網易另一個高潮？過到三個月先講

　　今日市場熱講網易(09999)《燕雲十六聲》手機版上線，作為Game迷嘅博客立即搵Game Play望望，然後我必須要陳冠希上身：「唔啱聽嘅說話你想唔想聽？」

　　呢隻Game聲稱係可以當單機遊戲嘅MMORPG，但博客一望，好聽少少講，佢係集各家之大成，難聽講句其實係一隻「縫合怪」，無錯佢係畫面做得好好，同近期《黑悟空》、《艾爾登法環》、《隻狼》相比，基本上可以追得上水平，不過唔少人反映，遊戲體驗感好差，特別係攻擊系統係令人摸不著頭腦；至於有咩環節係抄人，Game迷應該會發現，博客就唔多講了。

　　《燕雲十六聲》幾個月前同《黑悟空》推出時期銜接，有人認為可能係第二隻《黑悟空》，但《黑悟空》用左咁多年去打磨，係一套出色作品，如果要同《燕雲十六聲》做比較就有點唔公道了。不過新遊戲頭幾個月，必然有大批人俾畫面吸引，所以多人入game係好正常。

　　雖然好多財經人/大行都對呢隻GAME有正面評論，不過唔知佢地有無打開GAME啦。單機遊戲銷售主要睇預售同首周表現，不過MMORPG係睇周期性，即係起碼以一個季作為一個參考點，所以MMORPG首周表現好並不代表甚麼，反而你睇唔少博主都話呢隻遊戲「仍須打磨」，佢地已經講得好客氣了。

　　根據博客對遊戲業嘅了解，網易可唔可以靠呢隻遊戲攀上另一個高峰？博客就唔太樂觀了，如果呢個遊戲三個月之後線上總人數仲有開GAME一半，博客就覺得佢已經贏咗，至於落唔落場買網易就閣下自己考慮，博客都講得好「客氣」啦！

《編者按》本欄搜羅即市傳聞，惟消息未經證實，《經濟通》亦不保證內容之準確性。