《魚缸博客》老鋪黃金都入到ＭＳＣＩ，博客跌晒眼鏡！

　　《魚缸博客》今日博客望到ＭＳＣＩ公布執位，喺芸芸股票之中，博客見到隻老鋪黃金
（０６１８１）入咗中國指數同新興市場指數，博客係感到意外的。
　
　　意外嗰點並唔係佢入到指數，而係ＭＳＣＩ當佢係「新興市場」。博客覺得老鋪黃金最犀利
嗰位，就係將傳統飾金買賣，變化成一種「奢侈品」，而呢種奢侈品係市場未見過，就算有，都
未必做到好似老鋪黃金咁出位。
　
　　即係話，「奢侈品黃金」係ＭＳＣＩ眼中，就係一個新興藍海，而老鋪黃金就係國內一哥。
博客留意到，呢幾年鑽石價格不斷下跌，同時人工鑽石又不斷侵占市場，所謂「鑽石恆久遠，一
顆永流傳」，呢支歌仔已經無得再唱，消費者已經唔賣帳。
　
　　咁可能意味住，國內「飾金＋奢侈品」概念，有機會取代鑽石地位。你諗真吓，飾金最起碼
係黃金，可能老鋪黃金賣個種飾金存在好高溢價，但你賣出去市場未必可以當奢侈品溢價回收；
但鑽石一買一賣，市場回收根本唔值錢，３萬蚊鑽石玩下手可能得１萬幾千，真係嚇死人。
　
　　所以ＭＳＣＩ呢種操作，可能預示住黃金市場嘅變化，當純手工、值錢嘅黃金雕刻，用高於
飾金嘅溢價賣去市場，老鋪黃金嘅股價，可能真係今日高位、明日低位。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。