《小傳日記》比亞迪A股漲停！「天神之眼」可以有幾神？

　　中美講數疑幻似真，以為傾緊數點知半路又開打，實在令孖屐唔上唔落又心大心細，好似今日魚缸下晝忽然又炒起無人駕駛概念，都唔知跟唔跟好。

　　今朝隻比電(00285)已經跟著蘋概炒起，據講蘋果M5晶片正式量產，今年下半年開始就會上市，iPad Pro有望成為首發搭載M5嘅新產品，隨後M5晶片版嘅Mac機、Vision Pro都會今年底陸續登場。以之前消息講比電就係砌得最多iPad嘅果鏈商，iPad能夠首發M5晶片就自然令孖屐睇好iPad銷量，比電當然有望受惠。

　　不過到下晝比電忽然升幅擴大，一開晏晝市就即刻飆多2.5銀錢，原來係輪到BYD(01211)有事公布，中午BYD公布下星期一會召開「智能化戰略發布會」，希望透過「天神之眼」系統「讓每一個人都能暢享高階智駕」。隨後比電同BYD股放量大升，BYD A股仲出現難得一見嘅升停板！全日埋單比電狂升差唔多兩成，BYD H股都升夠一成有多。

　　除咗BYD系，其實今日全線無人駕駛概念股都齊齊炒起。但睇勻咁多報道，對於BYD下星期一嘅發布會，普遍都只係得上面簡單幾句，但就已經令BYD系炒成咁樣，相信已經有大量擁躉提早上車。「天神之眼」前年就已經發布，去到上年底正式全國開通無圖城市領航，毋須地圖就可以實時捕捉道路環境信息，可以做到通行紅綠燈、自主超車、繞障等，以級數計應該算係L3至L4之間。

　　BYD一向喺無人駕駛上消息唔多，而今次平地一聲雷，即刻引發無限憧憬，基本上都係基於孖屐對BYD嘅信心。究竟「天神之眼」可以有乜更新都係拭目以待，今日炒成咁樣，BYD應該都唔會想就咁交行貨。「天神之眼」呢個名咁犀利，大有「Big Brother is watching you」嘅感覺，如果BYD真係可以率先實現車路雲一體化，除咗對BYD係重大利好之外，對於神州嘅科技層面上都算係重要嘅里程碑，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。