狼英落馬，才明白快樂原來很簡單

 　　狼英落馬，普世歡騰。有人問，使乜咁開心，嚟緊仲有大把嘢你受，我就話，有得開心點解唔開心咗先？你知唔知好多香港人，四年嚟都已經冇真心笑過？

　　時間係星期五下晝兩點半，地點係我公司，大家嘅手機同時響起熟悉嘅叮叮聲，「又係啲新聞app，煩！」「咩話，梁振英3點半見記者？仲要喺特首辦？」「有咩講吖佢，一係就鬧記者去醫院騷擾佢老婆探個女，一係就話自己預備連任架啦！」「吓！唔好咁啦，特首辦喎，佢咁膠用政府資源幫自己做勢？」「話唔定係炒財爺，先下手為強，呵呵。」你一言，我一語，每次佢突然出嚟講嘢見記者，大家都唔會向好嗰方面諗，四年來，大家都已經慣咗。

　　「唉！又要調隊crew落去，煩！幾時先唔使聽呢條友講嘢！」「一係佢唔做，一係你唔做，你揀啦！」「吓，乜我哋有得揀咩？」哈哈哈哈………一輪苦笑，怎料一語成「讖」。

　　下午3點，政圈、傳媒開始瘋傳，689，886。「吓，點會呀？佢噚日先仲攞住支筆同張摺櫈落區喎。」「但傳佢個女喺醫院成個月喎，會唔會係個女有咩事…？」「我都係覺得講佢個女，佢心雄到死，點會唔連任？」下午3點23分，now新聞app將呢個消息推上push，消息九成確認，但係大家都係不願相信，因為大家都認為，香港好難再發生呢啲大好事。當大家仲諗緊now會否步亞視後塵，十分鐘後，佢哋做咗贏家。「梁振英宣布因為要照顧家庭，不會競逐連任」，消息震撼全港，各大小newsroom開始做到死，但大部分行家少不免，係掛住個笑臉咁去忙。

　　太耐無好事發生。呢個係2016年12月9號嘅小總結。

　　唔少建制輿論認為，既然佢屋企都出咗問題，又毅然決定退場，就唔好再針對佢，唔好落井下石，又認為慶祝嘅人涼薄。梁齊昕嘅病況固然令人擔心，但而家係梁生將呢樣嘢講成為佢止蝕離場嘅原因，公眾就有理由去問，齊昕出事可以追溯到2015年頭，直到最近齊昕入院，傳媒報導已經有近一個月時間，直到最近，梁營都仍然一直喺度籌備緊689嘅連任工作，係最後一刻先至剎停，如果家庭因素真係咁重要，點解唔係早早就思考唔應該連任，而係等到個女出咗事先考慮？星期四仍然喺度「熱身」，伙同民建聯落區，攞住支筆同摺櫈，做足民意工程，何解一日內變臉？不過，以上呢條問題係唔問得嘅，因為當家庭因素呢張溫情牌一使出，梁粉或者好多非梁粉都會認為，係佢嘅私事，唔好再過問咁多，否則就係傷口灑鹽，葉劉亦都做足戲，話被689嘅說辭「感動」。

　　雖然過問會被批評，但大家都心裏都明白，齊昕又再一次成為擋箭牌，佢嘅病成為咗下台階。泛民建制都唔相信呢個係核心原因，中共中央嗰隻無形之手，先係幕後玩家。689對香港嘅制度所做成嘅破壞，比起現時政界數得出有機會做特首嘅人嚟講，都更嚴重，反轉嚟睇，為咗未來幾年，打壓反對聲音嘅準備工夫、最污糟嘅工作689都做齊，呢粒棋子用盡，棄之無悔。林鄭月娥原本不斷放話，會告老歸英，但係星期六即刻撲出嚟，話「情況有巨大改變，不得不重新考慮參選」，其實如果你係決定退休，689連唔連任、由邊個做新特首，對你嚟講有咩分別呢？胡官講得清脆，「唔明白當中嘅邏輯」。換言之，唯一合理解釋，林鄭就係預先安排好嘅梁振英plan B，皆因林鄭嘅形象，點都比689好，要推出未能付諸實行嘅政策，打得嘅佢點都會比689好。葉劉可能只係中聯辦一廂情願嘅16號愛人。

　　同時，又會立竿見影，一方面，對於想熱身入閘嘅人，話俾佢哋知衝紅燈無好下場，因為今日坐喺特首之位嘅人，就係咁樣衝出嚟嘅，加深「紅紅綠綠」嘅輿論。之前被梁營日吹夜吹已經「被紅燈」嘅雙曾，尤其是性格有啲懦弱嘅曾俊華，仲敢唔敢踩過界？主觀願望當然佢夠膽，但係仍要睇未來幾日嘅變化。 

　　慢慢地，我都染上咗「香港症候群」，徵狀同斯德哥爾摩症候群類似，就係被綁架多時，當綁匪俾少少甜頭我哋，我哋就會好高興，甚至愛上呢個綁匪，星期五就係集體病發之日。希望我哋唔會有一日，淪落到懷念689。否則，病理學嘅書又要為呢個病架個病徵，「無論好壞，為前朝緬懷」。