平機票｜香港航空8.26起落區大派千張$0機票！包埋20kg行李！一文睇晒咩航點、參加方法！

著數速遞

TEXT:Louise Yuen

17/08/2023

　　近期多間航空公司陸續推出各式各樣的機票優惠，繼國泰的「航空特選優惠」平機票之後，香港航空今日（17 日）亦公布為慶祝今年增設北京大興、福岡、布吉及名古屋 4 大新航點，將於 8 月尾在銅鑼灣鬧市舉辦「航點新推·機票大放送」活動，玩遊戲夾公仔即嬴走 $0 機票，終於唔使上網搶飛喇！

　　香港航空的「航點新推·機票大放送」活動將於 8 月 25 日至 27 日在銅鑼灣 Fashion Walk 舉行，由商場地下中庭至百德新街的位置也可以找到「巨型夾公仔機」、「百德新街打卡大道」、「小小機組人員扮裝間」及「巨型扭蛋機」4 大區域。

　　重頭戲一定是大派 1,000 張 $0 機票的「巨型夾公仔機」，夾中即中獎，所有免費機票均由香港國際機場「飛遇世界鉅賞」活動送出，而且涵蓋香港航空目前的熱門航點，包括峇里、曼谷、台北、首爾、沖繩、東京、大阪、北海道、北京(首都)、重慶、海口、三亞、上海等。最吸引是機票已包含 20kg 寄艙行李，只付稅款及附加費便可。由於每個航點所派發的機票數量不一，港航將於 8 月 23 日在官方 Facebook 公布不同航點的派發時間表。

　　要留意，港航只於 8 月 26 至 27 日早上 9 時於 Fashion Walk 地下中庭派發號碼籌，先到先得，派完即止。獲得號碼籌後可於當日指定時間內，在現場參與巨型夾公仔機遊戲，並登記領取機票換領信。此外，得獎者將另獲機票優惠碼，供同行乘客購買任何航點機票享現金折扣優惠。想排隊搶 $0 機票的，不妨先於香港航空網站或手機 APP 免費註冊成為金鵬俱樂部會員，當日再到 Fashion Walk 排隊領籌。