【10大中伏禮物】比「杯具」更悲劇！聖誕節收「金正恩」人人喊晒口

TEXT:Yan Law

05/12/2018

　　聖誕開Party，必不可少嘅一定係交換禮物環節，但唔知點解每年都硬係有人鐘意惡搞，送啲無厘頭嘅嘢畀人，搞到抽中禮物嘅「受害者」喊晒口兼反晒白眼！以為收到相架、擺設、毛公仔已經夠中伏，咁你真係未知咩叫低處未算低，一於等小編搵出「10大中伏聖誕禮物」，幫大家提早做定心理準備，收到嗰下都仍能保持尷尬又不失禮貌嘅微笑！

1. 金正恩嘜頭朱古力

　　收朱古力本身就冇咩問題嘅，但如果一打開個盒，見到入面係幾個咧起嘴笑嘅「金仔」……未免太驚嚇了吧！小編仲想弱弱地問一句，咁明目張膽地將「金仔」分屍兼吞落肚，會唔會畀佢話我哋對佢不敬，然後用高射炮處決我哋㗎？（願意做「死士」嘅可以按此購買～）

（圖源：Deviant Desserts）

2. 散銀

　　對大多數人嚟講，收現金幾時都好過收禮物，但如果你收返嚟嘅係一大樽散銀呢？咁就真係唔知好笑定好喊……千祈咪懷疑，呢個世界上真係有人癲到上心口，將張一百蚊紙唱散晒做一蚊（甚至一亳子），然後入落個樽度送畀人，過分啲仲會補句「都係錢嚟吖」！

3. 溫暖牌頸巾

　　雖然近年好流行handmade禮物，但如果收返嚟嘅係一條溫暖牌頸巾，都真係幾令人O嘴，尤其收嗰個係有男／女朋友嘅人，肯肯定佢哋會投以一個極怨恨嘅眼光，兼飛埋嚟一句「靠害呀」！

（《高塔公主》劇照）

4. 報紙

　　小編見過，小編真係見過！話說某年聖誕party，每個人都要帶$50嘅禮物返嚟交換，結果有人買咗$50報紙，搞到收禮物嗰個人即刻面都黑埋！

下頁睇更多「中伏禮物」

5. 化妝品／護膚品

　　雖然化妝品同護膚品都係實用禮物，但始終人人嘅膚質同需要都唔同、鍾意同用開嘅牌子又未必一樣，所以都係可免則免！而小編覺得收呢份禮物最中伏嘅時候就係，當送禮嗰個人走嚟問返你嘅用後感……

（《來自星星的你》劇照）

6. 性用品

　　唔知點解好多人總係鍾意將「平安夜」和「失身」拉上關係，搞到唔少人喺交換禮物嘅時間都會惡搞一下，送性用品（最常見係避孕套），其實大家有冇諗過收嗰個人（尤其女同事）會好尷尬嘅呢……

（《性在有情》劇照）

7. 一包米

　　雖然「米」係開門七件事之一，但係聖誕節拎包米返嚟交換禮物未必太誇張喇嘛，仲要勁抵死咁講多句「開講有話，柴米油鹽醬醋茶，柴我就難啲搵畀你，但係我畀咗一樣咁重要嘅米你，算唔話得呢」，真係會令人反晒白眼！

8. 杯

　　又係一個謎。明明每個人都係得一個口、明明每個人都唔想收杯做禮物，但唔知點解每次交換禮物，都硬係有人會送杯。究竟一個人需要幾多隻杯？究竟大家有冇將心比已？拜託唔好再送杯啦，真係「杯具」（悲劇）來了！

9. 聖經、通勝、運程書

　　雖然話就話聖誕係紀念耶穌出世，但如果不問收禮者嘅信仰，就硬送聖經畀人做聖誕禮物，其實都真係幾令人無言。除咗聖經之外，通勝、佛經機、運程書都有同樣效果，切忌切忌。

10. 禮物換領券

　　就算收到咩中伏禮物都好，都起碼叫做有份禮物拎喺手。禮物換領券？真係唔知咩人發明出嚟！最無奈嘅係送禮嗰個仲要好大安旨意咁話「Sorry，我唔得閒買禮物呀，畀張禮物換領券你先。放心，一定有得換。」、「今年我決定要吊下你哋癮，係咪好驚喜呢？」、「12月31日前，你拎呢張換領券畀我，就可以換到禮物一份」等等，真係佛都有火！