「尊貴的」立法會議員

　　唔知大家知唔知，官式上，稱呼議員個名之前，係要加個英文「Honourable」，中文「尊貴的」嘅稱謂；全因為佢地嘅特殊地位，無論你官至特首定係一個局嘅EO（行政主任），發封信畀議員，都要恭敬咁稱呼市民嘅代表。

　　揹住呢個稱謂，係唔係議員全身都特別尊貴，尊貴到可以打橫行？稱謂唔單止係對議員嘅一種敬意，更加可以視為令議員明白自己嘅身份有別於普通市民，唔單止係人地對佢有敬意，自己本身更加要自重，律己要更加之嚴格。

　　但好可惜嘅係，見到民主黨議員許智峯作出強搶EO手機嘅不智行為，事後更立即砌辭狡辯，指手機內藏議員私隱，企圖轉移民眾視線，實在係挑起眾怒、有負「尊貴的」三個字。我諗就算係一位3歲小朋友，如果強搶其他小孩嘅玩具，父母都必然加以痛斥、教導，更遑論係一位「尊貴的」議員？

　　許智峯行為不智，但同路人嘅「尊貴」泛民同樣係不智，並無將對官員、對建制派議員用開嗰把尺放喺許智峯身上。事件公開之後，所有泛民噤若寒蟬一樣，同佢地過往立即彈出嚟大力批評建制派、官員失德行為，完全係兩副咀臉。「錯就要認，打要企定」，從來都係自己人訓斥自己人最有效嘅方法，但點解泛民政黨全部龜縮唔去大義滅親？咁你之後再手執所謂嘅正義之劍時，又如何服眾？

　　「尊貴的」仲包括埋其他建制派議員。立法會其中一個最大功能，就係每年審批財政預算案，政府使幾多、收返幾多，生殺大權就係喺一班「尊貴的」議員身上。星期三（25日）立法會大會就係辯論財政預算案；呢個辯論，基本上除咗大主席唔發言之外，其他議員都會趁機會發言。點知18位議員發言之後，第19位范國威講緊嘅時候，排緊隊講嘅13人，一個都無喺度，成個會議廳就只係仲有黃定光坐定定。結果大主席梁君彥焗住宣布會議結束，真係見所未見、聞所未聞。議員每個月袋10萬蚊最重要嘅工作係咩？就係代表市民或自己界別喺議事堂上發聲，「尊貴的」淨係識得袋「好貴的」人工，但又唔返工，咁又點稱得上「尊貴」兩個字呀？