八婆有咩唔想知？竟然係同事嘅偷情史？(下)

　　上星期講到Jennifer撞破好姐妹Amy背住男朋友Tom同Edward偷情之後，Amy不但冇悔意，仲開始利用Tom對Jennifer嘅信任，搵Jennifer做擋箭牌去同Edward偷情。偷情男女收工後一直跟住Jennifer，正當Jennifer實在忍唔住，想開口之際⋯⋯

　　「你去邊頭呀？」Amy又再笑騎騎咁問。

　　「吓？我去旺角食飯呀⋯⋯你呢？」(明顯地無視男方)

　　「我哋？(望一望Edward)未知呀！」

　　對話完結後，現場變成一片Dead Air。因為佢哋二人竟然咁啱輪流有message，所以突然同時係Jennifer面前變咗低頭族，狂Send Message！兩分鐘過後，二人咁啱又同時抬起頭，停手冇再Text。Amy就瞇住果對腰果形嘅笑眼講：「我哋去觀塘呀！」之後，孖妹就在旺角站分開了。最慘係，其實Jennifer果晚冇約朋友去旺角食飯，當日行程係收工後就直接返屋企。Jennifer講大話話自己有街出，只係唔想再同偷情男女係埋一齊，所以是但搵個理由係旺角站同佢地分開，先再轉車返屋企。

　　其實，成件事帶綠帽的Tom係好慘，但佢都唔夠Jennifer慘，起碼佢乜都唔知，係冇知覺下死去。Jennifer就唔同，本身諗住乜都扮唔知，扮睇唔到就算，點知畀人迫咗佢做幫兇。被迫做咗幫兇都算，好姐妹仲要為咗偷情，無視你感受，做盡令你唔好受嘅事，日日拎把刀仔割你幾下咁。

　　就如剛剛地鐵站一事為例，其實點解要問Jennifer去邊頭？知你哋偷情唔想同Jennifer同區，唔想畀熟人撞到。但我諗佢都唔想撞到你哋！咁樣套人地去邊，再揀地方，令人感覺Jennifer的存在阻住你哋偷情，絲毫冇考慮過Jennifer當下嘅感受！

　　第二，點解面對面都要send message？你未諗去邊其實可以大大方方咁講出聲討論，唔需要收收埋埋好似唔想比Jennifer知咁。畀你迫咗做幫兇，實知你哋去偷情啦，唔洗突然又咁保密！一秒將Jennifer變做局外人，聽到都「鄧」Jennifer覺得心痛！

　　第三，人地唔篤爆你唔代表認同、支持你做緊嘅野．Jennifer只係唔想插手人地情侶之間嘅事，但Amy下下搵Jennifer做擋箭牌，冇諗過人地願唔願意不但止，假如有日穿咗煲，Jennifer同Tom嘅友誼就會因為你而破壞咗，佢根本跳入黃河都洗唔清，Amy連少少咁簡單嘅事都冇為對方考慮，真係當你好朋友極有限。

　　最終，Jennifer繼續自己吞聲忍氣，冇揭穿Amy。而Amy同Edward一齊咗冇幾耐亦都分開咗，繼續做Tom嘅好女友。但就冇人知究竟Amy身邊仲有冇Edward 2、3、4號。但好肯定，Jennifer同Amy已經唔再係孖妹，愛妻號嘅Tom緊係力撐女友，疏離Jennifer。呢件事亦教識Jennifer，有啲事唔好以為自己偉大啲、死忍，就可以保持最完美嘅結局。因為由你知道呢件事開始，結局會受傷嘅人就只有你。所以八卦事？真係唔好知咁多。