街舖滷水鵝驚喜發現

　　土瓜灣老街坊無人不認識江蘇街「七喜麵食小館」，此店屹立同一位置幾十年，地方簡陋，裝修地踎，衛生普通，招呼麻麻，但晚晚坐滿，更不時有十多人聚在門口等位。點解？市場不會死錯人！正因此處的出品，三個字形容——平、靚、正。

 

七喜的晚上，經常是這樣……有人等位。

 

　　生滾粥及雲吞水餃麵固然一貫高水準，最煞食，連鑊氣小炒亦頂呱呱，故能吸引大批忠實擁躉，寧願在此等位也不行過隔離街另外三間食肆，無他，水準高兩班波。

 

　　此店開山祖師老闆名嚴基，數十年來，風雨不改，由下午做到凌晨，親力親為個個崗位都掂，尤其小炒更撚到鑊氣香噴噴。

 

七喜的煎炸蒸小菜，皆獨步全區。

 

　　但去年初佢拉我表白：「碌sir，捱夠啦，我想同老婆去歎世界喇。」

 

　　咁好生意，聽講班老夥計立即埋班接手。通常，大將軍行開，多會出現這樣那樣的問題，例如出品水準急跌，又或，小股東出現矛盾。

 

　　但年多過去了，咦，冇乜事喎，出品水準依然，小炒也冇跌Watt。我按時去買生雲吞水餃返家煮，每樣半打共$63 ，用料精良，相當超值。

 

生雲吞水餃各半打，$63，真材實料。

 

　　各位區外老友，反正此店喺土瓜灣港鐵站出口，有空可以試試佢。幾十年老字號唔使執笠反而晚晚爆，大家應見識下。

 

七喜麵食小館

地址：九龍土瓜灣江蘇街二號
電話： 2714 9300

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

送禮活動浪接浪！想緊貼著數活動消息？即Like etnet Facebook專頁！► 立即讚好

• 1
• 2