《魚缸博客》之前新世界（０００１７）、英皇（００１６３），而家就到佳明集團（０１２７１），尚未償還嘅貸款金總額高達４８億元，其中要立即還嘅涉及貸款額為２７﹒４７億元，不過公司宣布暫時已取得若干貸款方豁免。　　　香港地產界出現債務危機，睇怕唔係一間半間嘅事，之前開槓桿借落錢高價賣麵粉，點知幾年過去樓價又彈唔翻上去，麵包賣得貴又去唔到貨，賣得平又找唔到銀行筆數，呢種兩難局面其實唔差得過恒大。　　　博客留意到，香港股票市場都有些少流動性乾涸，主要係之前好多人都配股、賣債、開票據，可以抽水嘅方法都用盡；地產股要想係股票市場抽水降溫，都可能係杯水車薪，救唔到幾多。　　　呢個困局歸根究柢，都係香港高樓價政策食足咁多年，又無做好結構性轉型，透過高地價去支撐政府庫房收入，某程度都係透支香港人幾代財富；其實「唔買樓」呢個問題，內地香港一樣面對緊，不婚、不孕都係主要原因，而家香港出生率下降，對樓宇需求自然減少，就算今日無關稅戰、無疫情，未來幾年樓價一樣會跌。　　　所以話，今年下半年先開始見真章，應該會有唔少地產公司會出現流動性緊張、債務危機問題，呢個可能係香港股市另一個「震撼彈」。都係嗰句，博客認為下半年股市應該無力再上，三頂已現，回調必出現，套現先講啦。　　《編者按》本欄搜羅即市傳聞，惟消息未經證實，《經濟通》亦不保證內容之準確性。

【說說心理話】照顧者壓力大 情緒出現問題應找心理醫生！嘉賓：「雖然很貴，但是值得的，他救了我一命！」► 即睇