《小傳日記》內捲內捲，全個神州都喺度內捲。外賣、電商、運輸各行各業都已經係血紅一片嘅紅海市場，當中造車更加係捲中之捲。今個禮拜理想（０２０１５）出架新車ｉ８，售價低過先前被睇淡一線之餘，連條實測片都被人抽秤有造假之嫌！　　　理想新車同人捲價格不得止，仲要捲「硬度」。早幾日理想出咗條實測片，用架ｉ８嚟同架８噸重嘅拖頭貨車迎面對撼，精彩程度堪比荷李活猛片，有分鏡有剪接，撞埋嗰吓零件四散，個拖頭更加撞到甩頭飛出嚟，條片仲特別用慢鏡重播撞車一刻，精彩到花生都唔記得剝。但就因為太精彩，有唔少人就質疑理想係咪造假，因為理論上私家車撞拖頭，無可能私家車仲完好無缺過重幾個噸位嘅貨櫃車，架ｉ８只係車頭撞凹咗些少，反而拖頭就撞到甩頭，簡直係物理學嘅奇跡！　　　事後更加有「黑粉」出片解構點解理想有造假嫌疑。其中最精彩嘅拖頭撞甩，有博主就質疑，一般拖頭車艙同車身一定要固定住，好少一撞就可以好似片入面咁撞甩。有唔少人直接去到被用嚟撞嘅拖頭車製造商東風乘龍個ｐａｇｅ度，質問佢哋係咪弱不禁風，甚至連架理想都撞唔低，即時引來官方回應話：「被擺了一道，聰明人一眼看出假」，即係已經暗示緊理想造假。　　　理想近年來都經常被人背後中傷、單打，早已經「用背脊唱慘歌」，但面對同行直指造假，理想都唔敢駁返轉頭。最新就對質疑作出回應，講明實驗係基於用戶真實交通場景模擬，「全權委託專業的第三方」測試認證，場地、設備同「隨機買的測試卡車」都係機構提供，理想無任何指定，反正就係「呢單嘢唔係我跟開」。　　　其實自理想發布新車之後已經連跌三日，今日差啲連紅底都不保，諗著同人捲硬度，結果反而跌得仲甘。睇嚟理想真係要捲嘅，並唔係架車夠唔夠硬，而係盤數仲夠唔夠硬！請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【香港好去處】2025去邊最好玩？etnet為你提供全港最齊盛事活動，所有資訊盡在掌握！► 即睇