《魚缸博客》中國飛鶴（０６１８６）發盈警，預料中期純利最多跌４７﹒３％，就算集團預告，準備動用唔少於１０億人仔回購股份，兼預期本年度派息總額唔少於２０億人仔，股價一樣勁插，最多瀉１８％，今早大部分時間均佔據大市值組別跌幅榜榜首。　　　講真如果純粹發盈警，股價本來唔應該跌咁多。博客仲記得２月中發盈警，預料舊年全年純利大跌，但當日股價都只係跌０﹒１％，幾乎唔使跌。而３月底公布舊年業績，純利按年大跌９７％，隔日股價唔跌反升半成。而家飛鶴半年純利最多跌４７％，都唔及蒙牛（０２３１９）舊年純利跌９７％咁甘，但飛鶴股價反應咁大，的確難以想象。如果真係要解釋，或者係因為今年股價一路高企。以噚日收市價５﹒７元計，比舊年低位已經升咗９３﹒５％。所以今日大幅回調似乎都講得通。　　　集團話收益及純利預期減少主因係向消費者提供生育補貼，導致收入有所下降；降低嬰幼兒配方奶粉的渠道庫存；所收政府補助減少及對全脂奶粉產品減值計提。　　　其實除咗補貼因素外，內地人口減少先係最大威脅。經濟壓力大、少子化嚴重、愈來愈多人傾向唔生育甚至唔結婚，所以奶類需求預料難有上升空間。講喺內地人口持續萎縮嘅大前提下，奶品業面臨嘅挑戰唔小。不過，中國飛鶴喺同業中算係比較可取，現價息率有約７％，預測息率有８％，傲視一眾奶品股。同業蒙牛分別為３％及４％，僅及中國飛鶴嘅一半。不過股價短期料受壓，不妨等到４元附近先考慮。　《編者按》本欄搜羅即市傳聞，惟消息未經證實，《經濟通》亦不保證內容之準確性。

獨家優惠【etnet x 環球海產】用戶專享全場95折，特價貨品更可折上折。立即使用優惠代碼【ETN1WWS】，選購五星級酒店級海鮮► 立即瀏覽