話說今日滙控(00005)宣布，計劃用每股155蚊向恒生(00011)進行私有化，全城轟動，大家都歸咎原因係咪恒生壞帳多，打算買返佢再精簡架構。

　　博客覺得，睇你用咩角度睇事物，博客認為，恒生私唔私有化都係咁上下，反正壞帳又唔會自然變好。由控股六成到控股百分百，有兩個可能性，第一就係展示滙控幾咁疊水，人地講到明係用自己錢，大拿拿千幾億港紙話買就買，證明滙控財力仲有係到。

　　第二個可能性，就係恒生可能本身有資產未被「完全釋放」，其實早前都好似傳出，恒生計劃將壞帳賣走，所以真係同壞帳無關；更大原因係恒生可能有資產「被低估」，可以係物業、貸款、黃金之類，呢樣東西未反映到股價上，甚至未有人睇到，只有滙控自己睇到，大拿拿千幾億，一定係買返個超越千幾億嘅東西，先叫合理，銀行係唔會死錯人的。

　　另外，博客見到樣有趣東西，就係今日09:30:04，有人用168蚊買左900股恒生，錢就唔係好多，都係15萬幾，不過人地私有化都係155蚊，你又用168去買，唔通想買返屋企當牆紙痴係到？喂，香港無實物股票好耐啦！

　　真係學老夫子話齋，呢鋪真係「耐人尋味」囉。

《編者按》本欄搜羅即市傳聞，惟消息未經證實，《經濟通》亦不保證內容之準確性。

送禮活動浪接浪！想緊貼著數活動消息？即Like etnet Facebook專頁！► 立即讚好