《魚缸博客》「你係咪中獎啦？中左啦？恭喜曬，暗盤有無走啊？無走等聽日囉……」　　　今早去到茶餐廳，幾耐無聽過聲音咁鼎沸，老闆話，好耐都未聽過人炒新股啦，今次呢轉蜜雪冰城（０２０９７）有人抽中有人抽唔中，想話暗盤追貨。　　　究竟佢點解會咁多人抽，我估計因為「生意太好」。　　　一個中國，幾十個省，每個省閒閒地幾千間，一杯檸檬水賣幾蚊賣到變餐飲巨企嘅神話，已經值得拎去上市。早幾日做完「啪骨」，走去銅鑼灣買一杯，價錢十幾蚊，幾多妹妹弟弟排到開巷，係香港地賣呢個價錢，真係倒流時光二十年，蔡琴把聲係喇叭傳出「是誰∼」　　　不過要回到現實，早前博客預測過，暗盤都係升三成，最多升五成，今日所見，都係升四成咁上下，多一口價都無。　　　生意幾好都唔足以支持個估值咁高，博客預計呢幾日上上落落炒完，好大機會回到二百蚊附近，甚至跌穿招股價都唔出奇。你估班大孖沙真係唔使食飯咩？聽勸啦仔，今日有得食好食啦！　　　利申：文體如有雷同，實屬巧合。　　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】新田科技城發展區發現明朝古墓群，有團體倡當局修改規劃，原址保留，你是否贊成？► 立即投票