《小傳日記》今日蜜雪集團（０２０９７）雪王同佢嘅７個小夥伴一齊上台敲鑼，上市儀式畫面都幾趣緻！更趣緻嘅當然係佢嘅首日掛牌表現啦！首日股價直飆４７％，高見２９８銀，一度市值衝破１０００億大關！一手帳面就賺到成萬幾蚊，抽中即沽嘅人自然笑得開心，但中籤率低至８％，要抽足２０００手先穩中一手，普通散戶基本上都係陪跑。如果你望住升幅流口水，都唔使氣餒，其實仲有方法可以分到蜜雪紅利！　　　蜜雪冰城喺全球開咗超過４﹒５萬間門店，靠嘅唔係自己開店，而係加盟模式，９９﹒９％嘅店都係加盟店。不過換句話講，蜜雪冰城嘅收入來源，主要係來自嗰４﹒５萬個加盟商，而唔係雪王ｆａｎｓ！　　　咁如果你想成為蜜雪嘅「合作夥伴」，前期投資要幾多錢？根據佢嘅加盟要求，至少要預備２１萬人仔。首先用蜜雪冰城嘅品牌名義開店，就一定要交加盟費啦，加盟費分三個等級，縣級城市就７０００人仔，地級城市要９０００人仔，而省會城市盛惠１１０００人仔，而且每年都要交；每年仲要交４８００人仔嘅管理費，管理費包乜？蜜雪會幫你搞營銷活動以及提供日常管理支援，確保你間店順順利利。除此之外，加盟商仲要交每年２０００人仔嘅培訓費，公司專人教你點樣整奶茶、雪糕，甚至連經營技巧都會教埋。　　　除咗運營相關嘅費用，設備同物料都有硬性要求，亦即係唔可以用出面嘅生產設備，你要統一向蜜雪買，費用大約要７萬人仔，包括製冰機、封口機、冷藏櫃、淨水器等等。至於首批原材料同包裝物料要求５萬人仔左右。另外，裝修要求全部都要跟品牌統一風格，費用大約６萬人仔。計計埋埋，單係呢啲「入場費」已經接近２１萬，仲未計鋪租、人工同其他雜費。　　　鋪租嘅話，蜜雪建議選址喺學校附近、商業街區或者年輕人集中的地方，至少１２平方米（約１２９呎）。以深圳城中村為例，一間１２平方米嘅鋪位，每個月租金大約要８０００至１萬人仔。當然，如果你喺一啲高級商場開舖，租金就更加貴啦！　　　至於人工方面，蜜雪冰城嘅店鋪規模通常唔算大，兩個人就夠搞掂：一個負責點單，另一個負責製作飲品。深圳人工水平都唔低，每個月請兩個員工，至少要支出１萬人仔左右。　　　燒咗咁多錢，間店終於可以開張啦！但幾耐先可以回本呢？以招牌嘅「冰鮮檸檬水」為例，賣４蚊人仔一杯，成本只需１﹒２蚊人仔！而其他產品，例如珍珠奶茶、雪糕等，材料成本通常都係佔咗２５％至４０％。根據官方數據，蜜雪冰城每間店嘅日均銷售額大約４１８４人仔，日均單量３６７杯。以此計算，每個月就有１２萬人仔左右嘅營業額，當然啦唔同ｌｅｖｅｌ城市嘅購買力同行業競爭都唔同，唔可以一概而論。　　　你可能覺得蜜雪冰城咁有知名度，而且具備成本優勢，好似係一項幾好嘅投資。但其實想加盟蜜雪冰城仲難過ＩＰＯ抽新股！根據招股書數據，２０２１年至２０２４年９月，蜜雪冰城總共收到超過４２０萬份加盟申請，但通過率竟然唔夠５％，仲低過ＩＰＯ一手中籤率８％！投資者提交加盟申請後，仲要經過筆試同面試，如果面試冇通過，就要到現有門店工作一個月先可以再次申請，過關斬將，經過了５％嘅殘酷淘汰後，就可以解鎖人生新成就－－千億市值公司嘅合作夥伴，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【香港好去處】2025去邊最好玩？etnet為你提供全港最齊盛事活動，所有資訊盡在掌握！► 即睇