《魚缸博客》內地平價茶飲「蜜雪冰城」嘅經營者蜜雪集團（０２０９７）近日喺香港招股，吸引大批投資者踴躍認購，最終埋單獲１﹒８４萬億銀孖展認購，成為港股新「凍資王」。以蜜雪集團公開發售額３﹒４５億元計，超購５３１８倍。　　　本來平平無奇嘅茶飲股，突然平底一聲雷，居然打敗眾多獨角獸，成為港股史上最大新股凍資王，背後原因的確耐人尋味。而更特別嘅係，官媒《證券時報》今日頭版發布評論文章，指蜜雪冰城ＩＰＯ認購佔盡「天時地利人和」，但提醒投資者需冷靜思考，避免風險。　　　官媒發文唔係無原因嘅，事關蜜雪招股熱爆，連帶兩隻潛水已久嘅茶飲股鹹魚返生，忽然成為熱炒股，升幅之鉅就連近期熱炒嘅ＡＩ股都自愧不如。茶百道（０２５５５）噚日收升９％，今日一度急飆３４％，現時升幅接近全銷。而奈雪的茶（０２１５０）仲誇張，噚日最多抽升４４﹒４％，收市升幅收窄，但都升３３％。奈雪今日再接再厲，最高曾升近４３％，現時仲升緊２８％。無端端升咁多，難怪官媒出來叫冷靜。　　　蜜雪集團成為港股史上最大凍資王，令唔少人覺得意外，皆因之前上市嘅兩隻茶飲股首掛皆鎩羽而歸。奈雪２０２１年上市首日，股價收跌近１４％，之後股價一直潛水。股價最低跌至１﹒０７銀，以上市價１９﹒８銀計算，股價最多蒸發９４﹒６％。而茶百道舊年上市首日，股價收跌２６﹒９％，股價至今同樣未試過返去上市價１７﹒５銀。股價舊年９月甚至跌至３﹒９８銀（除淨後３﹒５９１銀）較上市價１７﹒５銀，最多蒸發近八成。　　　股價潛水咁多，相信自有原因，內地近年消費降級，茶飲市場競爭激烈。２０２４年上半年，茶百道營收下跌約一成，純利急插約六成。不過，茶百道就算純利大跌，起碼都叫有得賺。但奈雪２０２４年上半年，營收雖然只微跌約２％，但半年埋單盈轉虧蝕近４﹒４億人仔。不過又唔使咁意外，事關奈雪自２０２０年起，除咗２０２３年賺千三萬人仔之外，其餘年年蝕，所以蝕錢基本上系常態。　　　或者你會話，蜜雪集團旗下賣嘅係平價茶飲，啱曬而家下沉市場，分分鐘長做長有。不過，參考招股書，蜜雪集團２０２３年營收按年升４９﹒６％，但到２０２４年前三季度，營收升幅已經急速放緩至２１﹒２％，升幅已經唔見咗一大半。所以跟炒都要睇路，如果接咗火棒唔識走，隨時變咗大閘蟹！　《編者按》本欄搜羅即市傳聞，惟消息未經證實，《經濟通》亦不保證內容之準確性。

獨家優惠【etnet x 環球海產】用戶專享全場95折，特價貨品更可折上折。立即使用優惠代碼【ETN1WWS】，選購五星級酒店級海鮮► 立即瀏覽