《小傳日記》最近，泡泡瑪特（０９９９２）真係風頭一時無兩，無論係股價定係消息面都係日日有新料，真係妥妥嘅「頂流」！泡泡瑪特股價連番飆升，更將創始人王寧送上河南首富嘅寶座，超越豬王牧原股份大老闆秦英林，認真係新消費打贏舊消費！　　　尋日，泡泡瑪特又搞咗一單大新聞，全球唯一嘅初代薄荷色ＬＡＢＵＢＵ喺永樂春拍上以１０８萬人仔嘅價錢成功成交，呢隻ＬＡＢＵＢＵ高１３１ｃｍ，用ＰＶＣ做嘅，仲係全天下獨一份嘅薄荷色，當屬潮玩界嘅「天花板」。除咗呢隻薄荷色ＬＡＢＵＢＵ，喺同場拍賣會上，仲有一隻全球限量１５隻嘅啡色ＬＡＢＵＢＵ以８２萬人仔成交，呢啲數字真係聽落嚇人，不過拍賣呢Ｄ嘢好多潛規則同內部玩法，大家聽完當趣聞就得。　　　講起泡泡瑪特有幾Ｈｉｔ，就連神州嘅銀行都要搭順風車。最近平安銀行喺全國多地推出咗一個吸引新客嘅活動，只要係純新客戶，開戶之後存超過５萬人仔定期３至６個月，就可以獲得泡泡瑪特嘅ＬＡＢＵＢＵ盲盒，而如果辦埋信用卡，就有機會攞最新３﹒０版嘅盲盒！銀行話啲盲盒係正規渠道買返嚟嘅，保證係正品。不過，幾年前河南村鎮銀行瘋狂攬儲導致爆雷，前車之鑑，就算官方無意見同行都有意見啦，因此有部分地區嘅監管部門已經發通知，禁止銀行用送禮品嘅形式嚟拉存款。　　　到最後，小傳想同大家分享，原來唔係所有ＬＡＢＵＢＵ系列公仔都叫ＬＡＢＵＢＵ！例如ＬＡＢＵＢＵ家族嘅族長，即係啡色嗰隻原來叫ＺＩＭＯＭＯ，至於粉紅色頭上有朵花嘅就叫ＭＡＫＯＫＯ，大家如果要炒ＬＡＢＵＢＵ，記得先做好功課，以免發生將Ｃｈｉｉｋａｗａ叫成「卡哇痴」嘅慘劇，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇？】美國空襲伊朗核設施，你認為會否引爆中東核衝突？► 立即投票