《小傳日記》萬眾矚目，外號寧王嘅鋰電池一哥寧德時代（０３７５０）終於喺噚日登陸港交所，正式「Ａ＋Ｈ」上市，亦係今年全球目前為止最大的ＩＰＯ，由於發行價相對於Ａ股股價折讓唔多，搞到散戶心大心細，孖展認購雖然超過百倍，比起早前超購過千倍嘅蜜雪相差甚遠。即使係咁，都無阻寧王噚日Ｈ股首掛高收１６％，升幅之大確有啲出乎意料。咁都未算，今日係Ｈ股上市第二日，股價收市再升一成，並帶挈Ａ股今日一度升６％。完美示範唔使靠比Ａ股折讓，掉返轉頭用Ｈ股帶動Ａ股升，等Ａ股班小散戶可以搭順風車，今日齊齊舉杯痛飲同歡慶。　　　不過，睇返寧王Ａ股股價走勢圖，２０２１年尾寧王股價曾經升到６９２人仔，以今日收市２７４人仔計，高位唔見咗六成。又難怪嘅，過去兩年，雖然電動車需求有增無減，但由於鋰原料供給過剩，導致鋰價過去兩年持續下跌。以２０２２年１２月氫氧化鋰價格觸及每公斤８５美元的高點計，鋰原料價最多暴跌近九成。雖然鋰電池價格跌幅遠細於鋰原料，但鋰原料價格一日唔回升，鋰電池價格一日有壓力，難怪寧王舊年營收首次錄得按年下跌。　　　而家寧王布局全球，除咗位於福建省寧德市嘅大本營之外，喺四川，江蘇，山東等１０個省亦有生產基地。其中寧德基地同四川基地被世界經濟論壇評選為全球燈塔工廠，亦係鋰電行業僅有嘅兩座燈塔工廠。此外，寧王仲先後喺德國圖林根，匈牙利德布勒森設立兩個海外生產基地，其中德布勒森生產基地更係歐洲產能最大嘅鋰電池工廠。據報舊年寧王仲打算喺花旗國密歇根州建廠，但花旗國唔批。不過，來緊會繼續喺西班牙同印尼開展新項目。　　　咁大嘅產能，可以消化得曬咩？相信好多散戶同筆者都有同樣嘅疑問。寧王當然話無問題啦，唔係都唔會馬不停蹄咁四圍擴充。睇番過去五年資料，寧王產能不斷倍升，從２０２０年唔到不到７０ＧＷｈ到２０２４年９月７００ＧＷｈ，５年升咗９倍，遷締造全球最大鋰電池神話。問題係，呢種高速速度仲可以維持幾耐？咁大嘅產能，一旦市場出現逆轉點算好？好似上月７號咁，花旗國開打關稅戰，當日上證綜指收跌７﹒３％，深證成指挫９﹒７％，而寧王Ａ股當日瀉１１﹒５％，明顯跑輸大市。而家花旗國態度雖然軟化，貿易戰打唔成，但唔表示日後就一帆風順，特別係寧王畀花旗國列入同軍方關連企業名單，有乜嘢風吹草動隨時受牽連。　　　筆者收筆之際，睇到股壇長毛忍唔住發文指，寧王Ｈ股股份僅佔其股本總數３﹒４％，言下之意大家明唔明？寧王股價或者會繼續升都唔定，但股價升同基本面未必完全有關，唔表示市場都睇好後市潛力。所以大家買時買，記得保持冷靜。請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇？】民建聯「小花」莊雅婷公布參選香港小姐後極速退選。你認為區議員選美有否問題？► 立即了解