呢個月以來阿爺都不斷間接表達咗對於長和(00001)賣巴拿馬港口嘅不滿，不過「誠哥出手，滴水不漏」，據《彭博》引述最新消息報道，長和方面決定如期推進同貝萊德牽頭財團交易，力爭4月2號就要甩手資產。

　　一早就話小小超上京只係因為自己生意所需，誠哥同接捧長和系嘅小超先係賣港口關事嘅人，為避口風仲連業績會都唔開齊齊潛水，可以話全身上下都係戒備狀態咁去搞埋單刁。

　　之所以話係滴水不漏，全因長和明知敏感，早喺公布前已經做好萬全準備，仲設埋獨家條款保證磋商期145日內都會以貝萊德牽頭財團作為優先磋商對象，令神州方面就算想在商言商由國企出手洽購都針插唔入，令阿爺可以參與嘅機會再減低。

　　以往蹟嚟睇，目前上面對應該正係全力搵緊長和痛腳嚟抽秤，但要喺誠哥身上找到破綻就的確係唔容易，如果北京發力過猛，只會招致更壞結果，

　　股價嚟睇今日長和就彈返些少反映推進交易利好，不過新一次業績都講明會限制資本開支，即係就算賣港口得米，都未必會加大派息甚至派特別息，而家炒長和真係流於消息面炒作，鍾意刺激咪跟囉，但想收特別息嘅就不如算罷啦！

《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】蘋果發布超薄iPhone Air，市場反應一般，股價跌1.5%。你認為其產品仍物有所值？► 立即投票