聯儲局減息四分一厘，滙豐隻P都終於有小小作動。滙豐銀行宣布，由明日起，下調港元最優惠利0.125厘，由年利率5.25厘調低至5.125厘。滙豐對上一次於2024年12月20日調整港元最優惠利率，當時減息12.5點子。

　　大家隻CAP又可以低返小小啦！以目前利率計算，P-1.75=3.375，以一個450萬物業、借30年、九成按計算，之前個CAP3.5%，月供18186；而家CAP3.375就月供17904，大拿拿少左282蚊，可以叫足一個月凍飲都無咩問題！

　　不過睇返香港H按一個月拆息就不停見高位，今日一個月拆息報3.36089厘，升14.982基點，是5月6日後最高，創四個月高位。

　　港美息差依然持續，P同一個月H都仲有1.5厘息差，相信仲有唔少人玩緊套息。雖然鮑威爾突然反口放「鷹」，但市場預計美國唔減息可能比減息更大件事，唔少人都話今年內起碼要減多兩次先叫「標準」，即係仲有半厘可以減。

　　點都好，雖然呢一水減息，業主們都係少一百幾十蚊，但都叫有個好開始，就快中秋了，照叫凍飲都唔怕啦！
　
《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】英澳加葡承認巴勒斯坦國，你是否認同這些國家的做法？► 立即投票