今日博客唔講港股、美股，想講下一隻被人話「妖到出汁」嘅A股--寒武紀(滬:688256)，睇返佢個走勢，2023年都係7、80蚊人仔，2024年尾就一路爆升最高見過818.87人仔，個升勢真係嚇親人。

　　咁佢係做乜產業呢？晶片，仲要係專門針對AI個隻NPU(Neural-network Processing Unit)，所以近呢兩年AI突然大爆發，佢個股價都一齊大爆發。不過有趣嘅係，公司一路都處於虧損狀態，點解都仲可以升到咁呢？

　　博客認真研究過佢份業績，佢背後班客仔係無寫名，但睇返佢之前中標嘅公司，都係國企。喔，博客明白了，原來係國企加持，唔怪得股價係咁升升升啦，咁幾乎係開外掛無限金錢無乜分別。

　　其實都唔難明白，因為被美國迫到入死局，自己仲唔努力發圍就死梗。但唔係老美迫中國，國家都唔會開始發力做晶片，連N記老黃都話，中國已經唔係以前嘅中國，我覺得佢唔係講緊華為中芯，而係背後呢間寒武紀。某程度佢都係「中國版英偉達」，不論技術研發定係股價走向都好相似，撐起2500億元人民幣市值係有原因。

　　博客覺得，寒武紀落香港上市，只係遲早問題，只要佢拎得出一樣產品係可以面對全世界，性能未必真係比N記好（好多時候呢類硬件唔多唔少都有性能溢出問題），可能做到八成甚至追平，但價錢平人一半，做好盤數，喺香港入成分股都無乜問題！畢竟全世界都走入AI市場，一塊好嘅NPU真係可以好搵錢！

《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet香港好去處推出小紅書版！立即追蹤@通仔GoGoGo 以獲取最新情報！► 即睇詳情