《小傳日記》近呢幾個月，內地兩大外賣平台京東（０９６１８）同美團（０３６９０）鬥
得你死我活。不過、更嚴格來講，應該係京東為搶佔外賣平台生意，大灑銀紙，推出百億人仔補
貼。今次京東出擊，唔單止益咗消費者，仲意外帶旺埋一眾茶飲店，難怪蜜雪集團
（０２０９７）股價近日接連創新高，今日股價高見６１８銀，首次登上６００元水平，仲連續
三日創新高！以今日最高價計，對比上市價２０２﹒５銀，短短３個月，蜜雪集團股價已經升咗
２倍幾，雖然之前唔少人睇好，只係估唔到升咁多。
　
　　蜜雪生意點解咁火爆？除咗各大電商平台提供補貼之外，京東外賣對入駐商家實行零佣金政
策，凡喺今年５月前入駐京東外賣平台，商戶獲得全年免佣。又補貼又免佣，為茶飲店提供唔少
福利，茶飲店即時有條件大割價，平時賣開十幾二十人仔一杯，閃購價全線低於九人仔。就算八
人仔以上都寥寥可數，大部分都得五六人仔。賣到咁平，連一班本來準備放棄茶飲嘅客仔都忍唔
住返轉頭幫襯。
　
　　生意好咗，做員工應該開心先係，起碼唔使擔心畀人炒魷魚先，又或者年底花紅分多啲。但
點知生意好有生意好嘅煩惱。噚日網上熱播一條短片，話說蜜雪溫州分店有位女店員一個人睇鋪
，由於生意火爆，店外大排長龍，女店員一邊整奶茶一邊忍不住崩潰落淚，仲要等攞貨嘅騎手安
慰佢，叫佢慢慢來。據個騎手講，佢半個鐘頭前都來過呢間店，當時店入面都係得女店員一個人
，認真慘情。所以，蜜雪生意好咗，店員有無得益暫時未知，但肯定要做到踢曬腳。
　
　　其實蜜雪呢單嘢並唔係單一事件！自從京東高姿態殺入外賣平台，跟住餓了麼又推優惠，所
以，茶飲店生意客似雲來。有其他茶飲公司店員同樣叫苦連天，話應付咗京東單，又要應付餓了
麼，跟住又要應付美團。生意火爆，但人手無加到。有員工話，已經連續三天，日做足１６個鐘
，返工食得一餐飯，食飯時間得嗰２０分鐘，水都唔敢多飲，怕要成日去廁所。所以話，公司生
意好咗，佢哋就捱驢仔。
　　
　　劉強東殺入外賣平台，大灑金錢，貫徹內地市場一貫作風，實行以本傷人搶佔市場，本來無
乜特別。但今次佢打正旗號，為騎手提供五險一金，並且享有法定節假日、有薪年假，並提供五
千人仔保底工資，為佢贏得唔少掌聲。結果，京東騎手得確有保障，但茶飲店店員就形同被剝削
。如果劉強東見到茶飲店店員咁辛苦，唔知佢有乜感想？
　
　　蜜雪生意咁好，但加盟店主為咗ｂｕｄｇｅｔ唔請多幾個員工幫手，難為店員ｃｈｏｋ嘢飲
ｃｈｏｋ到手痠，其實呢啲情況喺香港都見唔少！兩個張老闆可以考慮下，飛去溫州店連同加盟
商一齊粉墨登場，客串做店員，既可以幫輕喊住做的女店員，又可以挽回蜜雪形象，仲可以趁機
做下宣傳，一舉數得。請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。

《說說心理話》「四徑跑手」的驚人意志原來是這樣練成的：小時候曾挨窮挨餓，17歲來港定居，言語不通，沒有朋友… 到現在成為消防處救護總隊目► 即睇